نايم وطولك صحو...

نايم وطولك صحو
نايم...
نايم بريسم على بريسم غُفو
طولك وورد الچراچف
نايم مرشرش عطر.....
عش الحمام زغير ومنده..
من طراوه ومن حلاوة مستحه
نايم..
والله يدري بهالسبايه
تفاحه من تفاحه تخجل
واكبر التفاح يتماوج غنج
يزيح لحاف عن لحاف
والدنيا شته
نايم وكلشي يتثاوب..
روحي والشباچ والبيبان
وورود المخده
وشمعدان الشمع
وثياب الزغيره
حيره نومك
حيره تصحى
وحيره تغفى..
حيره ترضى
وحيره تزعل
وحيره يتخالط دمعنا
وحيره يصفى
نايم
وآنه وي شمعاتك اسهر
مدري ياهو البينه يبچي
مدري ياهو البينه يحچي
ومدري ياهو البينه ما ظل بيه دمع..
نايم وطولك صحو..
وشهل گباحه من الشمع؟
نايم وروحي شديدة حزن
والأيام ما هي أيام
لا تكبر عليّ آنا ماني بگد غلاتك
ليل وشموع وسكر كاسات
ما يخلص هواك
وعشرتك ليلة خضر
نايم وطولك صحو..
رگصة عبيد مشابگك
ومباوسك گهوة بدو
كل يوم تاخذني دناوة روحي يمك
غلطة مني وغلطة منك
واليصير يصير
لا تبخل عليّ
وك روحي شديدة حزن
والأيام ماهي ايام
لا تتعب تدور على غيري..
آنه غيري
وك آنه من أول عمر لآخر عمر!