مع حبي

من طرف **SeeMooN** الأحد يونيو 29, 2008 7:40 pm

في يوم من الايام واني اروح للكليه مالتي اقصد مالتي الي ادرس بيها مو مالتي
يعني مال الخلفوني طلعت الصبح للكليه اجيب صمون للريوك وره ماتريكت
رحيق الازهار ومربى الياسمين وماعون باكلاه بالدهن زيوت فوكس الالمانيه
غسلت ايدي وراها لبس الزي الجامعي لانه مايصير اروح عريان لانه راح اكون
مو على الموده وردت اطلع للكليه واني بالشارع رايح الى موقف الباص وجان
اشوف فتاة هم جامعيه تنتظر الباص وجانت هم لابسه الزي الجامعي مع الاسف
وكفت مسافة مترين واربع سنتمترات وخمس انجات عنها وما اعرف قلبي كام يدق يعزف يغرد
وصمت رهيب صار بالموقف اني اباوع عليها وهي لابستني لبس وجان يقطع هذا الصمت الرهيب
طيط طيط طططيط صوت الهورن مال الباص

وركبنه الباص وجان مقبط وبيه كرسي واحد طبعا اني كعدت عليه وهي وكفت
واني هسه وره 3سنوات اتندمت ليش ماكمت وكتلها اختي اتفظلي كعدي واني
اوكف هسه اليوم اتندمت مع العلم اني شهم اي والله علج ابو الشهم مدري ابو السهم
المهم مشه الباص وفجاه ظرب ابريك وجان خطيه البنيه تنجبج وتوكع بالباص واحنا
خربنه ضحك الكل بالباص يضحكون الي يكول شبيج ثوله والي يكول وثول اي والله وثول
خو اني طكيت من الضحك شلون وكعه وكعت هاهاهاهااهاه من اذكرها اخرب ضحك
دقيقه اذكرتها خلي اضحك هههههههههههههههه المهم قبل مانوصل للكليه بدقيقه كمت
كتلها اختي اتفظلي ابمكاني حتى ابين لها اني شريف ايكس لارج وجان تكعد اول ماكعدت
وصلنه للكليه يعني جان بين الكرسي وبين جسمها مسافة شعره واطخ الكرسي بس ماطخته
لانه وصلنه اني نزلت من الباب المخصص للنزول لانه طالب جامعي عيب اخربط النظام
وهي نزلت من الشباج لانه ازدحام الباص يعني شكد ما ازدحام ماكو مكان للسايق حتى
السايق ماجان موجود بالباص لانه ازدحام شلون وصل الباص ما اعرف

وصلنه للكليه بالجادريه ونزلنه هي تمشي واني امشي وراها وجان توكع ورقه من اللفكس
مالتها بدون ماتدري وجان اني اجيت ازروك على الورقه قبل ما اطخ الكاع وتوسخ الورقه
وجان اجيت ولزمت الورقه واتمرغلت بالكاع بس بعدين كمت ونظفت اهدومي من التراب
بالورقه ملاتها وصحتها اختي اختي ماجاوبت اختي اختي ولا تجاوب صحت قندره نعال قندره
وجان تكول نعم عيني بس اندرات عليه بحركه لا نساها طول عمري هي شعرها كاريه
من اندار وجهها عليه شعرها اندار وياها وفاتت شعيرات يم شفايفها وجان باصبعها
وخرت هاي الخصلات من الشفايف وكالت نعم واني وكتها بدون شعور كتلها نعم ياحبيبي
نعم انا شفايفك نغم وايامي قبلك ندم وايامي بعدك عدم عدم عدم ياحبيبي
وانطيتها الورقه وجان تكول شكرا ومدت ايدها تاخذ الورقه وجان اصبعها
يطخ ايدي لحظة ماطخت ايدي اني جسمي كام يرجف حسيت الارض تردح بيه وكمت
ارجف وتعرفون الواحد من يرجف جسمه يفرز سوائل ويكون محتاج الى التواليت فورا
واني في بدايه شارع الكليه الطويله وبس نخل اكو وجان اركض وره احدى النخلات بس
لكيت العميد مال الكليه وره هاي الشجره وجان اكوله العفو استاذي ورحت على الشجره
الي بصفها وجدت وزير التعليم العالي وجان اروح للنخله الي بصفها
ولكيت رئيس الجامعه هناك هاي شلون طركاعه

نلتقي بلجزء الثاني